r2vyln3rdioj14u-rld0ska where mountains meet the sea: Discontinuity

Discontinuity

I could blame da wye da sea is smoothed
da stanes; da sylk o touch; da waelin, laevin;
an will da haert be dere whin I come back?

Or I could blame da saandiloo. He wis clear
whit wye ta geng: dis wye noo, nae luikin
owre your shooder. Tide dusna wait;

see da wye da swill o joy is drained.
Dance daday. Damoarn you slip
inta eternity.

Or I could blame da hush at fills you
til you’re lik ta burst wi aa da wirds
at could be said but you hadd back.

Hit’s whit happens whan you step
in time, but sense a fault-line vimmerin
trowe you: dis side or dat?

Only da sea can greet an sing at da sam time:
shade an licht: cobalt, ultramarine an dan
da lönabrak – a tize, a frush o whicht.


Christine De Luca, first published in The Dark Horse, 28

waelin: selecting
saandiloo: ringed plover
damoarn: tomorrow
hadd: hold
vimmerin: trembling
greet: cry
lönabrak: surge of sea breaking on shore
tize: temptation
frush: splutter
whicht: white

No comments: